“SOMOS ARTISTAS!” é un obradoiro impartido por Migallas Teatro e organizado polas Concellerías de Cultura e de Normalización Lingüística do Concello de Pontevedra co fin de promover a expresión dramática e artística entre a infancia creando un espazo de socialización en galego.
Lugar
Pazo da Cultura de Pontevedra situado na Rúa de Alexandre Bóveda, s/n, 36005 Pontevedra.
Idades
Nenas e nenos de 5 a 11 anos
Horario
Taller 1: de 8 a 11 anos
Os luns de 18.00 h a 19.30 h
Número de participantes: 25
Comezo: 29 de setembro
Taller 2: de 5 a 7 anos
Os mércores de 17.30 h a 19.00 h
Número de participantes: 35
Comezo: 8 de outubro
Taller 3: de 5 a 7 anos
Os xoves de 17.30 a 19.00 h
Número de participantes: 35
Comezo: 9 de outubro
Duración
Cada obradoiro constará de 10 sesións de hora e media adaptadas aos períodos lectivos escolares entre setembro e decembro de 2025 a razón dunha sesión semanal.
Prezo
50 € por todo o obradoiro, co material incluído
Inscrición
Ata o comezo da actividade enviando un correo electrónico ao enderezo migallas@migallas.gal cos seguintes datos:
- Nome e apelidos do neno/a:
- Idade:
- Nº de taller:
- Nome de familiar ou titor/a de contacto:
- Número de teléfono do adulto de contacto:
- Enderezo:
As inscricións novas faranse por orde de recepción da solicitude. A formalización da inscrición e o pago da cota realizarase directamente con Migallas Teatro cando comece a actividade.
OBRADOIRO “SOMOS ARTISTAS!”
Este proxecto baséase en dous piares fundamentais: a creación dun espazo onde as rapazas e os rapaces desenvolvan a súa expresión artística e o fomento do uso da lingua galega entre a infancia.
- Descubrir e fomentar os recursos expresivos e comunicativos dos rapaces e rapazas
- Estimular a fantasía, desenvolver a imaxinación e as capacidades creativas
- Prepararalos para o xogo espontáneo e libre, vencendo a vergonza e a timidez e motivando o traballo en equipo, cooperativo e solidario
- Crear unha dinámica entre as nenas e nenos participantes de xeito que practiquen os xogos tradicionais de forma espontánea fóra do ámbito do obradoiro, nos parques, prazas e rúas do seu barrio.
- Fomentar a práctica de exercicio físico dun xeito divertido para evitar o sedentarismo infantil
- Promover as relacións de igualdade entre as nenas e nenos
- Favorecer a fluidez na expresión oral e escrita en galego
- Crear un espazo de socialización en galego
- Promover as relacións interxeracionais
- Aprendizaxe activa e gozo do noso folclore infantil poético (cancións, ditos etc.) e dos xogos tradicionais galegos
- Concienciación sobre o coidado do contorno urbano e natural
- Fomentar o hábito da lectura como gozo, en especial de libros en galego
Obradoiros de 5 a 7 anos
Os rapaces e rapazas de 5 a 7 anos participantes veranse metidos nunha aventura na que irán da man de artistas de épocas diferentes para poder superar varias probas de xeito cooperativo.
Aprenderán xogos e conseguirán superar as probas que lles poña o Pirata Escarapote para poder atopar o seu tesouro.
Durante as 10 sesións, os nenos e nenas desenvolverán as súas capacidades creativas mediante o xogo combinando actividades de expresión plástica, dramática e musical.
Así pois, escoitarán, crearán e representarán contos; pintarán e crearán obras artísticas; aprenderán xogos e cancións tradicionais e actuais…
Obradoiro de 8 a 11 anos
A través de artistas de épocas diferentes, as rapazas e rapaces desenvolverán as súas capacidades creativas sen ningún tipo de trabas nin de ideas preconcibidas.
Combinaranse as actividades de xogos e de expresión dramática, plástica e musical.
As actividades de “SOMOS ARTISTAS!” son dirixidas por María Campos e Carlos Yus, membros fundadores da compañía pontevedresa Migallas Teatro.
Migallas Teatro vén realizando desde a súa fundación no ano 1992 numerosas actividades de promoción da lingua e da cultura mediante montaxes teatrais, gravacións de discos como “Canta connosco!”, “Pan de millo” e “Zaragallada”; sesións de contacontos, obradoiros etc.
Desde o ano 1998 ata o ano 2020 coordinou os obradoiros de expresión dramática, plástica e musical Á procura do tesouro.
Tamén coordina a páxina Orella pendella e realizou 25 programas da serie audiovisual Brincadeiras da lingua, para fomentar a práctica da lingua mediante os ditos infantís tradicionais.
