Libro Un avó especial

Portada do libro Un avó especial

A compañía Migallas teatro edita o libro “Un avó especial” sobre a doenza do alzheimer, dirixido aos nenos e nenas e a toda a familia en xeral, co deseño, produción e distribución de Kalandraka Editora.

O libro “Un avó especial” está baseado na obra teatral do mesmo nome que a compañía “Migallas Teatro” creou no ano 2005 co asesoramento de AFAPO (Asociación de Familiares de Enfermos de Alzheimer e outras demencias de Pontevedra), e que continúa representando, co obxectivo de axudarlles aos nenos e nenas a comprender mellor a doenza do Alzheimer.

Tras percorrer numerosos teatros, auditorios e centros culturais e educativos de toda Galicia, a compañía “Migallas Teatro”, animada tamén por AFAPO, decidiu converter esta peza dramática nun libro dirixido aos nenos e nenas “para que lembren sempre a historia do avó Manuel e da súa neta Rosiña”.

O texto de Carlos Yus e as ilustracións de María Campos contan a relación entre un avó e a súa neta dende que esta nace ata que ten doce anos. O avó arrólaa; cóidaa; ensínalle ditos, cancións, xogos… Co paso do tempo sucédense as risas e os enfados entre os dous pero, un día, o avó comeza a ter moitos despistes e, ademais, cámbialle o carácter. Rosiña, coa axuda dos pais, ten que facer fronte a esta nova situación.

Malia a seriedade do tema que trata, “Un avó especial”, ten un enfoque humorístico que persegue fomentar actitudes optimistas para afrontar os problemas que implica a doenza do Alzheimer e amosar a importancia que teñen os/as nenos/as para que os maiores vivan momentos felices.

Á parte da enfermidade, tamén se trata o tema da relación entre os/as nenos/as e os/as vellos/as en xeral así como diferentes modos de educar os rapaces por parte dos membros da familia.

Os avós preséntanse como transmisores da sabedoría tradicional e peculiar de cada pobo fronte á uniformidade cultural. Os ditos, os xogos e as cantigas populares, son un elemento fundamental nesta transmisión.

Para continuar navegando debes aceptar a política de rastros (cookies) Máis información

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close